来源：未知 时间：2014-12-06 15:59 作者： admin 点击：次

日職煞科3強爭標「假象」
日職今日衝線，表面睇飛腳、紅鑽同鹿角3隊都有權爭冠軍，實際上呢個只係錯覺，因為大阪飛腳今日作客德島漩渦，9成可以順利開W稱王，反而鹿島鹿角主場迎戰鳥棲砂岩場癲鳳鬥狂龍，戰況可能更激烈，「大」戰可期。

（有線18周六下午2:30直播）

飛腳贏降班德島夠封王
煞科日嘅3場重點波，飛腳對德島嗰場最冇意義，（有線61、201、148周六下午2:30直播），事關德島降梗班，實力又差飛腳成條街，响正式比賽4次對碰全部輸清光，而且飛腳今日小勝1球都九成九捧走聯賽冠軍，成為今季日職雙冠王（日聯盃早就落咗袋），兩隊戰意差天共地，J聯賽會猛煲今日3大戰役，講真只係個「騙局」。

由於浦和紅鑽同飛腳同積62分，表面上佢哋今日主場炒起名古屋鯨魚（有線64、203周六下午2:30直播），咁啱飛腳只能小勝、和或輸波嘅話，冠軍都會歸紅鑽所有。問題係紅鑽淨得球少飛腳7球，你信佢哋可以炒鯨魚8球以上咩？如果出現咁嘅賽果，肯定會被質疑係「八百長」（假波）。

鳥棲豐田陽平爭神射手
剩低嗰場鹿島鹿角對鳥棲砂岩，只要鹿角贏到3球或以上，飛腳、紅鑽又和甚至輸波的話，佢哋就會登上王者寶座，呢一點無疑會係鹿角嘅最大動力。不過，對家鳥棲雖則落後3分，淨得球少19球，原則上好難升上第3名攞走亞冠盃入場券，但係鳥棲射手豐田陽平喺射手榜只落後川崎個大久保嘉人1球，今日省兩粒就有望染指金靴，即使中場藤田直之、菊地直哉坐波監，鳥棲都要谷出去幫豐田爭取入波，所以1.65倍入球大抵玩。